බොහෝ අය පැමිණෙති වටයක් දෙකක් යාමට...

එපමණකි
....................................................
අන් දෙයක් නම් වෙත්ද මෙහි
පැමිණීම හා නික්මීම හැර
කල් තබා පැමිණි අය
නික්ම යන්නට පෙරාතුව
දෝතින් ගෙන පිළි ගනිත්
පැමිණෙන කලදි ඔබ

වටයකි දෙකකි එපමණකි
නික්මෙන්න ඔබට කල් සරිය

ඔබ පැමිණි බව හෝ ගිය බව
වැදගත්ද පොතේ ගුරුහට
තව බොහෝ අය පැමිණෙති
ඔබට පසු
වටයක් දෙකක් යාමට

(ආරියවංශ  රණවීර )

කපටි මහලු කුකුලා සහ ගේ කුකුලා

                  කුකුල් කොටුවට තරුණ කුකුලෙක් රැගෙන ආවේ එහි සිටින  කුකුලා දැන් වයසට ගොස් ඇති නිසාවෙනි ..

"හෙට උදේ ඉඳලා මේ කොටුවේ ඉන්න කිකිලියෝ ගැන මං බලාගන්නම්.. අංකල්ට දැන් ඉතිං දවල් වෙනකං සැනසිල්ලේ නීදා ගතහැකි " තරුණ කුකුලා වයසක කුකුලා අමතමින් කීය..

" එහෙම කරන්න එපා පුතේ.. අර නාකි කිකිළිය හරි මට ඉතුරු කරපංකෝ.. පොඩිකාලේ ඉඳලා  අපි එකට හැදුනු  අය.." නාකි කුකුලා පැවසීය..

" හිනෙකිං වත් හිතන්න එපා.. මමයි දැං මෙතන නිල ලත් කුකුලා .. දැං ඉතිං අංකල් පැන්ෂන් ගන්න. " තරුණ කුකුලා කීය..

එයින් අධෙර්‍ය්මත් නොවුනු නාකි කුකුලා යෝජනාවක් කලේය.."  එහෙම නං අපි පොඩි තරඟයක් තියමු.. මේ කොටුව වටේ රවුම් තුනක් දුවමු.. මම වයස නිසා මට මීටර් දහයක වාසියක් ඕනි..මං දින්නොත් මට නාකි කිකිළිය දෙන්න... ඔයා දින්නොත් මේ කොටුවේ ඉන්න ඔක්කොම කිකිලියෝ අයිති ඔයාට... මොකද කියන්නේ..? "

මීටර් දහයක් ඉදිරියෙන් නොව මීටර් විස්සක් ඉදිරියෙන් පිටත් වූවත් තමන්ට මේ නාකි කුකුලා පරාජය කීරීමට හැකි බව දත් තරුණ කූකුලා අභියෝගය බාර ගත්තතේය..

තරඟය පටන් ගෙන මුල් වටය අවසාන වීමත් සමගම, නාකී කුකුලා  පසු කිරීමට ඔන්න මෙන්න කියා තිබියදී වෙඩි හඬකුත්  සමග තරුණ  කුකුලා විසිවී මැරී වැටුනි..

ඒ සමගම කුකුල් කොටුව අයිතිකරු ඈතින් යමක් කියනවා ඇසිනි..

"   පර බල්ලෝ..තුන්වෙනි වතාවටත් මුං මට වික්කේ ගේ කුකුලෙක්නේ " !!!

#Copied

එම්බා ආදරණීය ඉතාලිය...!

 

* 'ලෝක සිතියමේ බූට් සපත්තුව' වන නුඹ, 

* ක්‍රිස්තු පූර්ව 71 වසරෙදී තම 40 වෙනි වියේදී ඝාතනයට ලක් වන රෝම අසුරුවකු (Gladiator) වූ ස්පාටකස් බිහි කළ නුඹ,

* ක්‍රිස්තු පූර්ව 44 වසරේ මාර්තු 15 දින ඝාතනය කෙරුණු, ජූලියස් සීසර් නම් රෝම අධිරාජයා බිහි කළ නුඹ,                                 
* ක්‍රි.ව. 79 වසරේ අගෝස්තු මස 24, 25 දෙදිනදී  පිපිරුණු විසූවියස් යමහලේ ලාවා වලින් යටවූ පොම්පේයි හා  හ‍ර්කියුලේනියම් නගර තම ඇකයේ සඟවාගත් නුඹ,

* ක්‍රි.ව. 64 වසරේ ජූලි මස 17, 18 දිනවල රෝමය ගිනි ගත් විට වීනා වාදනය කළ බව කියන, මාතෘ ඝාතක පාලක නීරෝ බිහි කළ නුඹ,
                                                       
* පීසා වල ඇලවුණු කුළුණ උසුලන් සිටින නුඹ,
         
* පාලම් 400 කින් යාවුණු, දූපත් 118 ක් ඇල මාර්ග වලින් වෙන්වූ, සුන්දර වෙනිස් පුරවරය අයත් නුඹ,                                 
* ලෝකයේ පැරණිතම විශ්ව විද්‍යාලය වන Bologna සරසවිය ක්‍රි.ව. 1088 දී ඇරඹූ නුඹ,

* අති උත්තම පාප් වහන්සේ හට සෙවණ දෙන වතිකානුව දරා සිටින නුඹ,

* බ්‍රහස්පතිගේ සුවිසල් චන්ද්‍රයන් වන අයෝ,යුරෝපා, ගැනිමීඩ්, කැලිස්ටෝ සිව්දෙන සහ සූර්ය ලප, සිකුරු කලා, චන්ද්‍ර ආවාට, මුලින්ම දුටු මහා විද්‍යාඥ, ගැලීලියෝ ගැලීලී බිහි කළ නුඹ,

*සෙනසුරු චන්ද්‍රයන් වන ඉයාපැටුස්,රියා, ටෙතිස්, ඩියෝනි සිව්දෙන සොයාගත් තාරකා විද්‍යාඥ, ගියොවන්නි ඩොමෙනිකෝ කැසිනි බිහි කළ නුඹ,
         
* සුප්‍රකට ගණිතඥ ලියනාඩෝ ෆිබොනාච්චි බිහි කළ නුඹ,

* මිනිසෙකුගේ මැදිකන උගුර හා සම්බන්ධ කෙරෙන යූස්ටේකීය නාලයන් යුගල සොයා ගත්, බාතොලොමියෝ යූස්ටේකී බිහි කළ නුඹ,

* මිනිස් සිරුරක කුඩාම සෛලයක් වන ශුක්‍රාණුවක් විශාලම සෛලයක් වන ඩිම්බය සමඟ එක්වන අඳුරු,පටු මඟ වන පැලෝපීය නාලයන් යුගල සොයා ගත් කාය ව්‍යවච්ඡේද විද්‍යාඥ, ගේබ්‍රියෙල් ෆැලෝපියෝ බිහි කළ නුඹ,

* රුධිර කේශනාලිකා සොයා ගත් මාර්සෙලෝ මැල්පිගී බිහි කළ නුඹ,

* කෘත්‍රිම සිංචනය මුලින්ම ලොවට හඳුන්වා දුන් ලැසරෝ ස්පැලන්සානි බිහි කළ නුඹ,

* ස්වයංසිද්ධ ජනන මතය සාවද්‍ය බව පරීක්ෂණාත්මකව තහවුරු කළ ෆ්‍රැන්සිස්කෝ රෙඩි බිහි කළ නුඹ,

*ලොව මුල්ම වායු පීඩනමානය ( Barometer ) තැනූ, ඉවැන්ජලිස්ටා ටොරිසෙල්ලි බිහි කළ නුඹ,

*ලොව මුල්ම රසදිය රුධිර පීඩනමානය ( Sphygmomanometer ) තැනූ සිපියෝනි රිවා රොකී බිහි කළ නුඹ,

* සත්ව විද්‍යුතය අනාවරණය කළ ලුයිජි ගැල්වානි බිහි කළ නුඹ,

* ලොව මුල්ම විදුලි කෝෂය හා බැටරිය තැනූ, ඇලෙසැන්ද්‍රෝ වෝල්ටා බිහි කළ නුඹ,

*දැන් වාමන ග්‍රහයෙකු ලෙස සැළකෙන මුල්ම ග්‍රහකය වන සෙරෙස් සොයාගත් තාරකා විද්‍යාඥ, ගයිසෙප්පි පියාසි බිහි කළ නුඹ,

* කණුවක බැඳ පණ පිටින් පුළුස්සා ඝාතනය කළ තාරකා විද්‍යාඥ, ගියොර්දානෝ බෲනෝ බිහි කළ නුඹ,

*ඇවගාඩ්‍රෝ නියමය ඉදිරිපත් කළ රසායන විද්‍යාඥ, අමාදියෝ ඇවගාඩ්‍රෝ බිහි කළ නුඹ,

* සෛල තුල ස්‍රාවයන් නිපදවන ගොල්ගි සංකීර්ණය සොයා ගත් නොබෙල් ත්‍යාගලාභී විද්‍යාඥ, කැමිලෝ ගොල්ගි බිහි කළ නුඹ,

* මැලේරියා පරපෝෂිත ක්ෂුද්‍ර ජීවියාගේ ජීවන චක්‍රය මෙන්ම ඇනොපිලිස් ගැහැණු මදුරුවන්ගෙන් මැලේරියාව මිනිසා ආසාදනය වන බව සොයා ගත්, ගියොවන්නි බැටිස්ටා ග්‍රාසි බිහි කළ නුඹ,

* කොළරා බැක්ටීයාව මුලින්ම සොයා ගත්, ෆිලිපෝ පැසිනි බිහි කළ නුඹ,

* ජලභීතිකා රෝගී බල්ලන් හා එම මිනිසුන්ගේ මොළයේ සෛල තුල වයිරසය අඩංගු 'නෙග්රි දේහ' නම් පොකුරු සොයාගත් ඇඩෙල්චි නෙග්රි බිහි කළ නුඹ,

* AIDS රෝගීන්ට  මාරාන්තික වන  නියුමෝනියා රෝගයක් ඇති කරන නියුමොසිස්ටිස් කැරීනි නම් අහිංසක බැක්ටීරියාව සොයා ගත්, ඇන්ටෝනියෝ කැරීනි බිහි කළ නුඹ,

* අඟහරු ග්‍රහ ලොව මත දුරේක්ෂයෙන් දුටු රේඛා කෘත්‍රිම ඇල මාර්ග ලෙස වරදවා හඳුනාගත්, ගියොවන්නි ෂියාපෙරලි බිහි කළ නුඹ,

* ගුවන් විදුලි යන්ත්‍රයේ නිර්මාණකරු, ගුග්ලියෙල්මෝ මාර්කෝනි බිහි කළ නුඹ,

* ලොව මුල්ම න්‍යෂ්ටික ප්‍රතික්‍රියාකාරකය නිර්මාණය කළ නොබෙල් ත්‍යාගලාභී භෞතික විද්‍යාඥ, එන්රිකෝ ෆර්මි බිහි කළ නුඹ,

* ටෙක්නීෂියම් (Tc) සහ ඇස්ටටීන් (At) යන මූල ද්‍රව්‍ය මෙන්ම ප්‍රති ප්‍රෝටෝන අංශු මුලින්ම සොයා ගත්  නොබෙල් ත්‍යාගලාභී විද්‍යාඥ , එමිලියෝ ජිනෝ සෙග්රේ බිහි කළ නුඹ,

* අභ්‍යවකාශයේදී  'එස්ප්‍රෙසෝ' නම් ක්‍රමයට කෝපි පිළියෙල කර පානය කළ මුල්ම පුද්ගලයා වන, සමන්තා ක්‍රිස්ටොෆොරෙටි යන අභ්‍යවකාශගාමිනිය ඇතුළු තම දරුවන් රැසක්ම උඩු ගුවනට යනු ආඩම්බරයෙන් බලා සිටි නුඹ,

*පෙර පාසල් අධ්‍යාපනය හඳුන්වා දුන් අධ්‍යාපනඥ, මාරියා මොන්ටිසෝරි බිහිකළ නුඹ,

*'මොනාලිසා' සිත්තම් කළ ලියනාඩෝ ඩාවින්සි බිහි කළ නුඹ,

* 'ඩේවිඩ්' ප්‍රතිමාව මූර්තිමත් කළ මයිකල් ඇන්ජිලෝ  බිහි කළ නුඹ,

* ප්‍රකට චිත්‍ර ශිල්පීන් වන රෆායෙල් සහ ගියෝටෝ බිහි කළ නුඹ,

* 'The Divine Comedy' පබැඳූ මහා කවි, ඩාන්ටේ අලිගියරි බිහි කළ නුඹ,

* 'The Prince' රචනා කළ දාර්ශනික හා ලේඛක, නිකොලෝ මැකියාවෙලි බිහි කළ නුඹ,

* මහා කවි හා ලේඛක ගියොවන්නි බොකාසියෝ බිහි කළ නුඹ,

* සුප්‍රකට නවකතාකරුවකු හා ලේඛකයකු වන ඇල්බර්ටෝ මොරේවියා බිහි කළ නුඹ,

* 'Last Emperor', 'Last Tango In Paris', 'Little Budda' සිනමා කෘති නිමැවූ ඇකඩමි සම්මානලාභී අධ්‍යක්ෂ බර්නාඩෝ බර්ටොලුසී බිහි කළ නුඹ,
               
* නාසි නායක හිට්ලර් සමග දෙවන ලෝක මහා සංග්‍රාමයේදී එක් වූ ෆැසිස්ට් නායක , බෙනිටෝ මුසොලිනී වැන්නෙකුත් බිහි කළ නුඹ,
                                               
* 'ෆියට්' , 'ෆෙරාරි' , 'ලැම්බොගිනි' වැනි වටිනා මෝටර් කාර් රථ ලොවට බිහි කළ නුඹ,

* මාරාන්තික වයිරස් වසංගතයකින් ලොවම ගලවා ගැනීමේ සටනක් ගැන ඩෑන් බ්‍රවුන් ලියූ,'Inferno' (නිරය) නවකතාවට තෝතැන්න වූ නුඹ,
                        
* Covid 19 වයිරස් වසංගතයෙන් මහා නරකාදී නිරයක් බවට අද දින පත්ව ඇති නුඹ, 
                     
මනුෂ්‍යත්වයේ නාමයෙන්,   
සුවපත් විය යුතුමය...!

Premashantha Kumarasiri ගේ මුහුනු පොත් වෝලයෙන් උපුටා ගැනුමකි.

නුඹ කොයි තරම් සුවඳ ද මගේ හිත ගාව...

සඳ දිය දෙවුන සේ සිනහව පිපුනාම
නුඹ කොයි තරම් සුවඳද මගෙ හිත ගාව
දෑ කුල සිරිත් සිටි සඳ මග අවුරාන
හමුවී වැලපෙමුද මෙලෙසින් හැමදාම...

නෑඹුල් පැතුම් අහසට නැඟ රහසේම
දිළිසෙන්නේ ද පුර පස වී සඳපාන
ඒ හඳ ඇයි ද දියවක දී මුළු රෑම
දිය වී ගිහින් රැඳුණේ තරු ඇස ගාව...

සඳ දිය දෙවුන සේ සිනහව පිපුනාම
නුඹ කොයි තරම් සුවඳද මගෙ හිත ගාව
දෑ කුල සිරිත් සිටි සඳ මග අවුරාන
හමුවී වැලපෙමුද මෙලෙසින් හැමදාම...

ලය මත පිපුණු උණුසුම් සුසුමක සුවඳ
සෝදා හල හැකි ද ගැරහුම් රළ ගාව
කඩඉම ලඟ ඉඳන් වත් නුඹ හැමදාම
මට අත වනාපන් නළියන නළ සේම...

සඳ දිය දෙවුන සේ සිනහව පිපුනාම
නුඹ කොයි තරම් සුවඳද මගෙ හිත ගාව
දෑ කුල සිරිත් සිටි සඳ මග අවුරාන
හමුවී වැලපෙමුද මෙලෙසින් හැමදාම...

හන්තානේ මතක....

හන්තාන කඳුවැටිය එදා වාගෙයි අදත්
මහවැලිය පුරුදු සේ ගලායාවී හෙටත්
සරසවියේ තුරුවදුලු මිලින වී නෑ තවත්
ඒත් අද කුමරියේ...ඔබ කොහෙද මම කොහෙද

එදා අප පෙම් වදන් දෙඩූ ලිය මඬුලු යට
පෙම්වතුන් පෙම් වදන් දොඩනවා
අප සමඟ එදා සිටි අවන්හල දෙසුම්හල
පුරුදු සේ බලාගෙන ඉන්නවා

මේ බිමේ සැඟව ඇති සිව් වසක අතීතය
යළි යළිත් මතකයට නැගෙනවා
මහත් වෙහෙසක් දරා සඟවන්න තැත් කළත්
නෙතු අගට කඳුලු බිඳු නැගෙනවා
       
                                        ගායනය-අමරසිරි පීරිස්

දුම්මල ගලට ගිය අම්මා

දුම්මල ගලට ගිය අම්මා

දුම්මල ගල ඉමේ මහ මූකලානේ
අඳෝනාව ඇඟ හීගඩු නඟන්නේ
කන්දේ් පරවේණී උළලේනියන්නේ
රෑ සමයමේ ඇයි මා බය කරන්නේ

අපෙ අම්මා දුම්මල ගලවන්න ගියා
ඒවා මිටි බැඳං වඳුරඹ පොළට ගියා
හාල් ටිකට පොල් ගෙඩියට ණයක් තියා
කොපි පොතකුයි පැන්සලකුයි ගෙනෙන්නියා

වැහි වැහැලා ගල ආඳා බඩේ උනා
අම්මා එදත් ඒ ගල මුදුනටම උනා
රූටා ගිහිං පාවුළ ගලටත් රිදුනා
අම්මා තිව් විලාපය තවමත් ඇසෙනා

ඇළබඩ රුප්පාව ළඟ රෑ හඳපානේ
ඉන්නා කලට මට දුම්මල ගල පෙනුනේ
ලෝබ නැතුව ඔය ගල දුම්මල දුන්නේ
අම්මා පෙරළුවත් තරහක් නෑ හිතුනේ

ගිං ගඟේ විලාපය (1984)

ගුරුවරු උගන්වතී.ඔවුහූ ඉගෙන නොගනිති.

                බොහෝ දිග ගමනක් වුවත් ඇරඹීමට පළමු පියවර තැබිය යුතු බව ගුරුවරු උගන්වති. එක කෝටුවකට වඩා කෝටූ මිටියක් ශක්තිමත් බව ගුරුවරු පවසති. රෝමය එක් දිනකින් ගොඩ නැගුනේ නැති බව කියා දෙති. නමුත් ගුරු ගැටළුවක දී ඔවුහූ ඒ කිසිවක් භාවිතාවෙන් නො පෙන්වතී.

             අවුරුදු 22ක් තිස්සේ තිස්සේ නො විසඳුනු වැටුප් විෂමතා ගැටළුවක් ගුරුවරුන්ට ඇති බවත් මෙතෙක් බලයට පැමිණි පාලකයන් එම හිමි වැටුප ගුරුවරයාගෙන් මංකොල්ල කා ඇති බවත් ගුරුවරුන් (අතලොස්සක් හැර) දනිති. එසේ ම දැන්වත් මෙම ගැටළුව විසඳී තමාට හිමි වැටුප ලැබිය යුතු යැයි ඔවුහූ බලාපොරොත්තු වෙති. නමුත් එය ලැබෙන්නේ කෙසේදැයි බොහෝ අය නොවිමසතී.

             අවුරුදු 22ක් තිස්සේ ලබා නොදුන් "හිමි වැටුප" එකවරම රිදී බන්දේසියක තබා දේ යැයි ඇතැම්හූ සිතති. මීටත් වඩා ය(ම)හපාලනයකින් පිරි රජයකින් විසඳුම් ලැබේ යැයි සිහින මවතී. මෙතෙක් කලක් කිසිවක් නොකළ (නමුත් වෘත්‍තීය සමිති නායකයන් අතර පතාක යෝධයන් යැයි සැලකෙන) ගුරු වෘත්තීය සමිති නායකයන් එක්වරම පිබිද සටන් මගට අවතීරණ වී එය ජයග්‍රහණයෙන් කෙළවර කරාවියැයි පිරිසක් සිතති.

              මෙතෙක් ගුරු ගැටළු නොවිසඳී තව තවත් ව්‍යාකූල වීම පමණක් සිදු විය. එයට ප්‍රධාන ම හේතුව ගුරු අයිතීන් වෙනුවෙන් පෙනී සිටිය යුතු වෘත්තීය සමිති තමන්ගේ වගකීම නිසි පරිදි ඉටු නොකිරීම ය. පක්ෂ, සමිති, කල්ලි වලට නොබෙදී තමන්ට හිමි දේ සාමූහිකව දිනාගත යුතු බව ගුරුවරුන් නොසිතීම ද තවත් හේතුවකි. ඔවුන්ගේ පවතින "සියලු ප්‍රශ්න ස්වයංසිද්ධව විසඳේ" යන ආකල්පය හේතුවෙන් අදටත් ගුරු අරගල පටන් ගත් තැනම ය. මේ වන විට එම ගැටළු වඩාත් තීව්රව පවතී.

                "ගුරුවරු දෙවිවරු" යැයි ද "හිමි වැටුප" ඉල්ලීම, අරගල කිරීම ඔවුන්ට නොගැළපේ යැයිද කියමින් පාලකයන් සෑම විට ම ගුරු ගැටළු මඟ හරී. දේවත්වයට ආරූඪ වූ ඇතැම් ගුරුවරුන් ද එය එසේමැයි පිළිගනිමින් දේවකාරිය කරමින් ද වැඳුම් ලබමින් ද සිටී. මෙම "දේව නිද්‍රාවෙන්" මිදිනු අකමැත්තේ නම් ගුරු හිමිකම් ලැබීම ද තවත් ඈතට යනු ඇත.

              සිහින දැකීමට ගුරුවරුන්ට ද අයිතියක් ඇති නමුත් එම සිහින මහපොළව තුළ යතාර්ථ කරගැනීමට නම් සටන් කළ යුතු බව වහ වහා ගුරුවරුන් අවබෝධ කර ගත යුතුව ඇත. සමස්ත රාජ්‍ය යාන්ත්‍රණය තුල ම ඉහලම බලපෑමක් කළ හැකි කණ්ඩායම තමන් බව තේරුම් ගත යුතු ය. පාලකයන්ගෙන් ඉල්ලා සිටින්නේ "හිමි වැටුප" මිස "වැඩි වැටුපක්"නොවන බව අවධාරණය කර ගත යුතු ය. එසේ මනා අවබෝධයක් සහිතව සමස්ත ගුරු පරපුරම එකම අරමුණ ඇත්තන් වී එක පොකුරකට බැඳුනු කලෙක ගුරු සටන් දිනනු ඇත.